Jokho moise eremale ne, benen ubenera nekemayende, ei nolo u kaisa mahi-mahi mekai beyelena koimiyandena, hiwa na foi mo, onomi mo, hiwa rime a yae koimiyande, kena beko yae koyande, benen ehee bukulu yae hubayande, ei nolo ra, hiwa yo bere hei isaiheban nolone, male yambi yae, benen fe waku yae, hebeyate, nekeyate. Na hiwa ron wali nahului, onomi foka rane mo koyate nekeyate. bere haei nekewande ne benen mana yae ne mekande na, nane mekai bena ya re fomale, na ma nane mekai ban mo, nebeinye bene nekemayende nda walina nekande nane mekai ban mo, ei wali mahi-mahi baende naei, nebei eisa mo ei joko eremale ra benen ei wali mekai nenda wanen mae yembondere, na kaban refi foise baende nane mekai bekore baede naei eiyae hokoimale.
Mana ya ei wali mekai mekande nekande ne, benen ei wali mekai ubene ne nekeyate ne nane mekai ban, nebeibe mana ya u mekhai mbai ei uwa ranne kinyewoke naese ei wali be re emale nenda merau, makese emele naei, benen nenda merau yembonde naei, eiyae yae hokoimale. Bene nekemayende nenda mae ei hokowande mana ya naei, nebei enye ro miyae hiwa naei hila rabo bele, nebei eisa hiwa ei aka baeke naei, hiwa ro miyae mbai ne nekande yo, ei yo yan, benen ei kani kaban nekande na, nebei hului mbai nda kani kela rane, nebei aerene ubene hayemale ei uwa naei foi ei re mo ban ei uwa ranne ro miyae hiwa yo nahului wali foi hubanayende. Nebei aerene Tuhan Allah aere mokouboke benen nda kani kela ran ne haumikoke naeise rabuhi belene, nanahele hele niyae, Tuhan Allah re nahului ei molomande, benen buma kolomande makenya-makenya nda kani kela ranne Naei kenare kole mae.
“Sebab Aku ini mengetahui rancangan-rancangan apa yang ada pada-Ku mengenai kamu, demikianlah firman TUHAN, yaitu rancangan damai sejahtera dan bukan rancangan kecelakaan, untuk memberikan kepadamu hari depan yang penuh harapan.“ (Yer. 29:11)
Eiyae buyaka ro miyae, nahului naahele elemale Tuhan Allah me herauboke ei wali re Naei kena re kole ma, nebei aerene aka baeke mem ei uwa eise joko eremale, benen nahului hubaimale rahe be Tuhan Allah kinyewoke.
Eyae buyaka ro miyae nahului nahele elemale aere Tuhan Allah yae me herauboke Naei ro buma re kaemanende benen nebei eisa buyaka ro miyae buyaka bu, buyaka kani kela ne nekate yoni-yoni nahului onomi foka hubanyate, Nebeieinye aka baeke men Tuhan Allah aere wali ikeume hului, Naei lae wake eisa kalia mokomale naese ei wali nahului Tuhan Allah re hakoimande benen ro miyae hiwa yo nahului hakomale.
AkuSentani, website mbai manenfa hele mokanboke na uwa nda kani kela kaban ne nda mbai mo era, nda website na imoli afaeu mbai buyaka afaeu bele mokanboke, nebeibe hiwa kalo naman hubayande na hiron niyae meyae naehele elande nda wensite ra Tuhan Allah re a wo komale buyaka kani kela, buyaka bu, benen buyaka ro miyae nemen Tuhan naei mo honoifiele hebeifiele.
nebeinye meyae mare riyande buyaka ro miyae makenya-makenya nekage nde-nde buyaka kani kela na, buyaka ro miyae re rabore halembe yo bere ende naei men maere hakomombo. Nda website akusentani mokanboke naeise rambung mbai Tuhan Allah buma kolomande re, na hiwa yo nie, rambung isaei-isaeire isaeimale nei nebei einye buyaka naei mam, naei wali mekai benen naei ahubare huwemale naei. ( 03-07/15 herzl.)
